Dau yn y llys ar gyhuddiad o lofruddiaeth

Mae dau ddyn wedi ymddangos gerbron llys i wynebu cyhuddiad o lofruddiaeth wedi marwolaeth dyn mewn pentref yn Sir Ddinbych.

Bu farw Gabor Peter Sarkozi, 38 oed, ym mhentref Gallt Melyd ar ôl ymosodiad nos Fawrth, Hydref 18.

Mewn gwrandawiad a barodd am bum munud, fe wnaeth Gary Bland, 41 oed o Bryn Avenue, Y Rhyl, a James Siree, 21 oed o Vale Road, Y Rhyl, gadarnhau eu henwau i'r llys.

Cafodd y ddau eu cadw yn y ddalfa tan iddyn nhw ymddangos yn Llys y Goron Caernarfon ddydd Mawrth.

Bu farw Mr Sarkozi - oedd yn hanu o Hwngari yn wreiddiol ond yn byw yn Y Rhyl - oherwydd anafiadau difrifol i'w ben a gafodd yn ystod ymosodiad arno.