Yn euog o lofruddio gyrrwr fan

Yn Llys y Goron Yr Wyddgrug mae dau ddyn yn euog o lofruddio gyrrwr fan yn Sir Ddinbych y llynedd.

Bu farw Gabor Sarkozi wedi ymosodiadau arno ym mhentref Gallt Melyd ger Prestatyn.

Clywodd y llys fod James Siree, 22 oed, a'i ewythr, Gary Bland, 42 oed, wedi dyrnu, cicio a sathru ar Mr Sarkozi, dyn o dras Hwngaraidd oedd yn byw yn Y Rhyl.

Roedd y ddau wedi gwadu llofruddio ond fe gymrodd y rheithgor awr a hanner yn unig i'w cael yn euog.

Dywedodd y Barnwr Mr Ustus Griffith-Williams ei fod am ystyried y cyfnod y byddai rhaid i'r ddau dreulio dan glo cyn cael gwneud cais am barôl.

Roedd Siree a Bland wedi gwadu lladd Mr Sarkozi ar Hydref 18, 2011, gan honni ei fod wedi ceisio ei helpu wedi iddyn nhw ddod o hyd i Mr Sarkozi wedi i rywun arall ymosod arno.

Bydd y barnwr yn cyhoeddi ei ddedfryd ddydd Mawrth.