Abertawe 3-1 West Brom

Llwyddodd Abertawe i drechu West Brom yn Stadiwm Liberty gan godi i'r wythfed safle yn yr Uwchgynghrair.

Cyn y gêm roedd yr ymwelwyr yn drydydd yn y tabl, ond roedd eu gobeithion o aros yno yn deilchion wedi ychydig dros ddeng munud.

Sgoriodd Abertawe wedi 9 munud, gyda Michu yn rhwydo am yr wythfed tro y tymor hwn. Daeth y gwaith creu gan Sbaenwr arall - Pablo Hernandez.

O fewn dau funud, roedd Pablo yn creu eto, a'r tro hwn, Wayne Routledge fanteisiodd i roi Abertawe ddwy gôl ar y blaen.

Os oedd cefnogwyr yr Elyrch yn uchel eu croch, fe gododd lefel y sain yn uwch cyn yr egwyl.

Rhwydodd Routledge ei ail yn y gêm i roi mantias o dair i Abertawe. Ond yna eiliadau cyn yr egwyl fe ddistewodd y dorf rhywfaint pan gafodd Romelu Lukaku un yn ôl i West Brom.

Ond fe ddaliodd tîm Miochael Laudrup eu gafael ar y fantais yn yr ail hanner, gan sicrhau bod Abertawe wedi cyrraedd nod y rheolwr o 20 pwynt yn hanner cynta'r tymor ymhell cyn pryd.