Cyhuddo dyn wedi damwain ger yr Wyddgrug

Mae dyn wedi ei gyhuddo o achosi marwolaeth drwy yrru heb ofal, gyda gormod o alcohol yn ei gorff.

Bu farw Kieran Arnold, o Cymau ger Wrecsam, mewn gwrthdrawiad ym Mhontblyddyn ger yr Wyddgrug ar Fehefin 17.

Mae dyn o Bontblyddyn wedi ei gyhuddo o achosi ei farwolaeth.

Bydd yn ymddangos o flaen llys ar Hydref 21.

Digwyddodd y gwrthdrawiad rhwng Land Rover Discovery arian a Ford Transit gwyn ac oren ar yr A541 rhwng Pontblyddyn a Chaergwrle.

Bu farw Kieran Arnold o'i anafiadau.

Ar y pryd, dywedodd mam Kieran, Donna, bod "Kieran yn fab gwych i David a finnau ac yn frawd mawr annwyl i Aaron a Steffan."

"Hoffwn ddiolch i bawb am eu cymorth a chefnogaeth drwy gydol y digwyddiad ofnadwy yma."