Arian yn cael ei gynnig i gwmni ceir ddatblygu

Mae na obaith newydd i hen ffatri Hotpoint ym Modelwyddan wrth i gwmni sydd yn cynhyrchu cydrannau ceir gael cynnig arian gan Lywodraeth Cymru i ddatblygu.

Roedd cwmni Reflex & Allen wedi dweud ei bod nhw'n gobeithio symud i'r hen ffatri beiriannau golchi. Y bwriad oedd y byddai hwn yn rhan o gynllun i greu parc cerbydau.

Fe fyddai tai ac unedau busnes eraill hefyd yn defnyddio'r safle.

Cwmni Hadleigh Industrial Estates fyddai wedi bod yn gyfrifol am y datblygiad, ond oherwydd problemau ariannol ar y funud olaf ni ddigwyddodd y cytundeb.

Nawr mae Llywodraeth Cymru wedi cynnig buddsoddiad fel bod cwmni Reflex & Allen yn medru symud i'r hen ffatri.

Mi fyddai'r arian yn cael ei ddefnyddio i brynu offer newydd ac yn ôl y llywodraeth mi fyddai yn diogelu 200 o swyddi yn y tymor hir.

Mae'r Aelod Cynulliad lleol Llafur, Ann Jones wedi croesawu'r newyddion, gan ddweud:

"'Dw i'n croesawu'r cynllun yma ac yn edrych ymlaen at weld y safle yn datblygu gan greu a gwarchod swyddi sydd wir eu hangen yma ym Modelwyddan.

"Rydyn ni angen mwy o swyddi high-tech yn yr ardal a 'dw i'n gobeithio y bydd cwmnïau eraill yn dangos yr un hyder a Reflex and Allen trwy fuddsoddi yma."