Rhondda Cynon Taf: treth yn codi 4.5%

Mae Cyngor Rhondda Cyngor Taf wedi cefnogi strategaeth gyllid eu cabinet fydd yn gweld treth cyngor yn y sir yn codi 4.5% ar gyfer 2014/15.

Mae hyn yn golygu bydd perchnogion eiddo band D yn wynebu talu £1,438.34 y flwyddyn ar gyfartaledd o fis Ebrill ymlaen.

Dywedodd y cyngor eu bod wedi gallu pontio'r diffyg o £20m roedden nhw'n wynebu dros y flwyddyn nesaf.

Meddai'r Cynghorydd Anthony Christopher, Arweinydd y Cyngor: "Er y pwysau sydd wedi cael ei roi ar yr awdurdod mae pasio'r gyllideb yn dangos ein bod â rheolaeth gref o'r sefyllfa ariannol.

"Yn yr hinsawdd economaidd anodd yma nid oes gan gynghorwyr obaith o ennill cystadleuaeth poblogrwydd oherwydd mae'n rhaid i ni wneud penderfyniadau caled.

"Dros y 18 mis diwethaf, mae'r broses o gytuno ar y gyllideb yma wedi bod yr yn anoddaf erioed i ni ei phrofi."

Un o'r toriadau a gynigwyd oedd rhoi'r gorau i ariannu canolfan gelfyddydau'r Miwni ym Mhontypridd.

Fe gafodd deiseb gyda 4,000 o enwau ei chyflwyno i Gyngor Rhondda Cynon Taf ddydd Llun yn gwrthwynebu'r bwriad.

Dywedodd llefarydd i'r cyngor y bydd y Miwni yn cael ei drafod gan y cabinet yn hwyrach, ar ôl iddyn nhw gael y cyfle i fynd trwy'r ymatebion.