Gwrthdrawiad: Marwolaeth cerddwr

Bu farw dyn ar ôl iddo gael ei daro gan gar ger Ffairfach, Llandeilo.

Fe ddigwyddodd y gwrthdrawiad ar yr A476 rhwng Ffairfach a Charmel tua 21:00 nos Sadwrn.

Yn ôl yr heddlu bu farw'r dyn 49 oed ar ôl iddo gael ei daro gan Vauxhall Corsa coch.

Yn dilyn y digwyddiad fe gysylltodd y gyrrwr â'r gwasanaethau brys, ond bu farw'r cerddwr yn y fan a'r lle.

Roedd y dyn a fu farw yn hanu o ardal Penygroes.

Dywedodd yr heddlu eu bod yn awyddus i siarad â thystion a oedd yn teithio rhwng Ffairfach a Charmel pan ddigwyddodd y gwrthdrawiad.