Cwest: 'Hofrennydd methu glanio achos gêm bêl-droed'

Mae cwest wedi clywed fod hofrennydd wedi plymio i'r ddaear yn Afghanistan ar ôl methu â glanio ar gae pêl-droed oherwydd fod chwaraewyr arno.

Cafodd pum person, gan gynnwys Cymro oedd yn swyddog yn y llu awyr, eu lladd yn y digwyddiad ger Kabul ar 11 Hydref 2015.

Roedd yr hofrennydd Puma Mk 2 yr oedd Geraint 'Roly' Roberts yn teithio ynddi yn ceisio glanio ym mhencadlys Nato ger y brifddinas.

Dywedodd adroddiad i'r digwyddiad gafodd ei chyhoeddi fis Rhagfyr y llynedd fod yr hofrennydd wedi mynd yn sownd yn nhennyn balŵn wyliadwriaeth gyfagos ar ôl gorfod hedfan o gwmpas y cae.

Roedd yr awyr-lefftenant Roberts, oedd yn dod o'r Rhyl ac yn dad i ddau o blant, yn 44 oed pan fu farw.

Clywodd y cwest ei fod wedi marw ar ôl cael anaf i'w ben ac y byddai hyn wedi golygu ei fod yn anymwybodol.

Dywedodd adroddiad gan y patholegydd nad oedd yna unrhywbeth y byddai unrhyw un arall wedi gallu gwneud i achub ei fywyd.

Clywodd y cwest hefyd dystiolaeth gan y sarsiant Simon Craig, oedd yn hedfan mewn ail hofrennydd oedd hefyd yn bwriadu glanio ar yr un cae.

"Wrth i ni gyrraedd, nes i sylwi'n reit hwyr fod nifer o chwaraewyr ar y cae," meddai.

"Roedd yn rhaid i ni hedfan ymhellach i'r dwyrain gan nad oedd modd i ni lanio ar y cae tan iddo gael ei glirio."

Dywedodd eu bod wedi cael gwybod am y balŵn, ond fod y tennyn oedd yn ei gysylltu yn "anodd ei weld".

Ychwanegodd nad oedd wedi gweld yr hofrennydd arall yn taro'r tennyn, ond ei fod wedi clywed synau ar y radio a'i bod hi'n "amlwg fod rhywbeth wedi mynd o'i le".

Mae'r cwest yn parhau.