'Yng Nghymru mae cynllun myfyrwyr mwyaf hael y DU'

Wrth i'r drefn newydd o gyllido myfyrwyr ddod i rym dywed yr Ysgrifennydd Addysg ei bod yn fwy hael na'r un cynllun tebyg yn y DU ond mae rhai yn ofni y bydd myfyrwyr yn wynebu mwy o ddyledion.

O dan y drefn newydd does yna ddim grant tuag at ffïoedd dysgu i'r rheini sy'n dechrau yn y brifysgol, ond bydd yna gyfraniad at gostau byw a mwy o gymorth i fyfyrwyr rhan amser.

Yn ôl y ffigyrau diweddaraf, mae lefelau dyled myfyrwyr o Gymru wedi codi i dros £20,000 ar gyfartaledd am y tro cyntaf.

Dywedodd un corff ymchwil bod y drefn newydd yn golygu y byddai myfyrwyr o Gymru yn gadael prifysgol gyda dyledion "llawer iawn yn fwy" nag yn y gorffennol.

Mae ffigyrau Cwmni Benthyciadau Myfyrwyr yn dangos bod gan fyfyrwyr o Gymru ar gyfartaledd ddyled o £21,000 pan mae nhw'n dechrau ad-dalu.

Dywedodd Yr Ysgrifennydd Addysg, Kirsty Williams: "Rwy'n hollol hyderus bod yr hyn rydyn ni wedi gallu ei gyflwyno yng Nghymru y cynllun mwyaf hael yn y Deyrnas Unedig, ac mae'n unigryw yn Ewrop.

"Nid yn unig ry'n yn rhoi cymorth i is-raddedigion llawn amser - rydyn ni wedi gallu darparu cymorth ar gyfer myfyrwyr rhan amser ac ar gyfer ôl-raddedigion hefyd."

Yn ôl yr Ysgrifennydd Addysg, mae hi wedi gwrando ar arbenigwyr a myfyrwyr ac roedden nhw eisiau cymorth ar gyfer costau byw ar ddechrau eu cyrsiau.

Bydd yn rhaid i fyfyrwyr fenthyg yr arian i dalu am y ffïoedd dysgu i gyd ond pwysleisiodd Kirsty Williams na fydd angen iddyn nhw dalu yr arian yn ôl nes iddyn nhw ddechrau gweithio ac ennill dros £25,000.

"Y bwriad," medd yr arbenigwraig ariannol Lowri Clement, "yw sicrhau bod unrhyw un yn gallu mynd i goleg.

"O'm mhrofiad i dyw myfyrwyr ddim yn becso lawer am y sefyllfa - dyw e ddim yn ddyled sy'n cael ei ystyried fel dyledion eraill mewn bywyd, hynny yw fel dyled cerdyn credyd."

Ond mae'r Higher Education Policy Institute yn credu nad yw effeithau negyddol y newidiadau wedi cael digon o sylw.

Yn ôl y Cyfarwyddwr, Nick Hillman mae yna "rai agweddau positif iawn" - er enghraifft, rhoi cymorth i uwchraddedigion a myfyrwyr rhan amser - ond mae'n dweud bod yna lai o arian ar gael i'r myfyrwyr tlotaf fel rhan o'r drefn newydd.

Dywedodd: "Dan yr hen drefn, sydd dal mewn grym i fyfyrwyr ddechreuodd cyn eleni, mae'r myfyrwyr tlotaf yn gallu hawlio hyd at £9,500 trwy gymysgedd o grantiau a benthyciadau, ond dim ond £9000 sydd ar gael iddynt erbyn hyn."

Ychwanegodd bod y drefn newydd hefyd wedi ei llunio ar y sail na fyddai disgwyl i rieni orfod cyfrannu.

"Y canlyniad yn y pendraw," meddai, "yw y bydd myfyrwyr yn gadael prifysgolion gyda dyledion llawer, llawer, llawer yn fwy nag erioed o'r blaen."