Diswyddo Hughes wedi diffyg sbarc i dymor Southampton

Mae Southampton wedi diswyddo eu rheolwr Mark Hughes ar ôl iddo fod wrth y llyw am wyth mis.

Fe wnaeth y Cymro ymuno â Southampton ym mis Mawrth dau fis ar ôl cael ei ddiswyddo gan Stoke City.

Roedd Southampton yn wynebu cwympo i'r Bencampwriaeth ddiwedd y tymor diwethaf cyn i Hughes gymryd yr awenau.

Ond mae'r tîm wedi cael dechrau sigledig i'r tymor yma gan ennill dim ond un o 14 gêm yn Uwch Gynghrair Lloegr, a'u gadael yn y tri isaf.

Hughes oedd rheolwr tîm cenedlaethol Cymru am bum mlynedd rhwng 1999 a 2004.

Bu hefyd yn rheolwr ar Queens Park Rangers, Fulham, Manchester City a Blackburn Rovers.