Ymchwiliad heddlu i wrthdrawiad angheuol yn Nhonypandy

Mae Heddlu'r De yn ymchwilio i wrthdrawiad angheuol yn Rhondda Cynon Taf fore Sul.

Fe gafodd y gwasanaethau brys eu galw wedi adroddiadau fod fan Nissan NV 200 wedi gwrthdaro gyda dynes oedd yn cerdded ar Ffordd Princess Louise yn Nhonypandy.

Fe gafodd y ddynes 65 mlwydd oed ei chludo i'r ysbyty, ond bu farw yn ddiweddarach.

Mae'r llu yn gofyn i unrhyw un sydd â gwybodaeth neu a welodd y fan yn cael ei gyrru cyn y gwrthdrawiad i gysylltu gyda nhw ar 101.