Gwrthdrawiad A458: Gyrrwr yn ddifrifol wael
- Cyhoeddwyd
Digwyddodd y gwrthdrawiad ar yr A458 yn Buttington ger y Trallwng
Mae gyrrwr yn ddifrifol wael yn yr ysbyty wedi gwrthdrawiad rhwng tri cherbyd ar yr A458 yn ardal Y Trallwng nos Wener 24 Ionawr.
Roedd Citroen Saxo Glas yn teithio o'r Trallwng i gyfeiriad Amwythig pan darodd yn erbyn Fiat 500 coch tua 11.20pm.
Fe darodd y Fiat yn erbyn polyn telegraff gan olygu bod rhai cartrefi cyfagos heb drydan am gyfnod.
Ychydig yn ddiweddarach fe darodd Renault Clio arian oedd yn teithio o gyfeiriad Y Trallwng yn erbyn blaen y Saxo.
Mae gyrrwr y Saxo wedi cael anafiadau difrifol.
Mae gyrrwr a theithwyr oedd yn y Fiat gefyd yn cael triniaeth am anafiadau yn yr ysbyty.
Roedd yr A458 rhwng cylchdro Buttington a Halfway House ar gau tan yn hwyr fore Sadwrn 25 Ionawr.
Mae'r polyn telegraff bellach wedi ei drwsio.
Mae Heddlu Dyfed-Powys yn awyddus am unrhyw wybodaeth am y digwyddiad.
