"Pobl anabl isio pleidleisio, ac isio d'eud ein d'eud"

Mae angen i bobl sy'n ddall neu'n rhannol ddall gael eu "cynnwys" mewn etholiadau a'u cefnogi i bleidleisio yn annibynnol, yn ôl ymgyrchwyr.

Mae'r broses o roi croes mewn bocs yn un weledol iawn ac mae etholwyr sydd â nam golwg yn dweud ei bod yn anodd bwrw eu pleidlais yn breifat ac yn gyfrinachol.

Yn ôl sefydliad yr RNIB, dim ond un ymhob pump o bleidleiswyr dall, a llai na hanner sy'n rhannol ddall, oedd yn teimlo eu bod wedi gallu pleidleisio yn annibynnol yn etholiadau diweddara'r Deyrnas Unedig yn 2019.

Tu hwnt i hynny, roedd 53% o'r rhai gafodd eu holi gan yr elusen yn dweud nad oedden nhw'n gallu darllen gwybodaeth am yr etholiad, gan gynnwys cardiau pleidleisio.