Dirwy o £2m i gyngor sir wedi marwolaeth gweithiwr ffordd

Mae cyngor wedi cael dirwy o £2m ar ôl i un o'u gweithwyr farw wedi iddo gael ei daro gan dractor.

Roedd Stephen Bell, 57, yn ailosod wyneb ffordd yng Nghasnewydd - a hynny o gefn lori arllwys - pan gafodd ei daro ar 18 Gorffennaf 2019.

Fe wnaeth y cyngor gyfaddef eu bod wedi mynd yn groes i'r ddeddf iechyd a diogelwch yn y gwaith ac maen nhw wedi ymddiheuro i deulu Mr Bell.

Maen nhw wedi cael gorchymyn i dalu £2m yn ogystal â gwerth £9,780 mewn costau.

Fe ddigwyddodd y gwrthdrawiad ar ffordd Langstone Court, sy'n rhedeg dan draffordd yr M4.

Clywodd Llys y Goron Caerdydd fod gan Mr Bell a phedwar o aelodau staff Cyngor Casnewydd, gan gynnwys arweinydd tîm, awdurdod i fod ar y safle ar y pryd.

Ond daeth ymchwiliad y Gweithgor Iechyd a Diogelwch i'r casgliad nad oedd y cyngor wedi cymryd y camau ymarferol disgwyliedig er mwyn sicrhau bod y safle yn ddiogel.

Maen nhw'n nodi y dylid fod wedi sicrhau bod ardal diogelwch o faint digonol rhwng y man gweithio a'r rhan o'r lôn oedd yn dal ar agor.

Fe blediodd Cyngor Casnewydd yn euog i fynd yn groes i'r ddeddf iechyd a diogelwch yn y gwaith.

Dywedodd Phillip Nicolle, un o ymchwilwyr y Gweithgor Iechyd a Diogelwch: "Mae methiannau'r cyngor wedi cael effaith ofnadwy ar deulu Stephen Bell.

"Byddai wedi bod modd i osgoi'r digwyddiad trasig yma pe bai'r cyngor wedi cymryd camau syml i sicrhau bod mesurau diogelwch yn cael eu gweithredu."

Dywedodd Cyngor Casnewydd mewn datganiad eu bod yn "ymddiheuro o waelod calon" am farwolaeth Mr Bell, gan ychwanegu ei fod "yn aelod gwerthfawr o'r tîm".

"Mae'r cyngor yn cymryd ein dyletswyddau iechyd a diogelwch o ddifrif pob tro. Fe bledion ni'n euog ar y cyfle cyntaf.

"Roedd polisïau, mesurau a hyfforddiant mewn lle pan ddigwyddodd y gwrthdrawiad, ond mae adolygiadau manwl wedi eu cynnal ers y digwyddiad.

"Bellach, mae mwy o adnoddau iechyd a diogelwch ar gael, mae mesurau wedi cael eu cryfhau ac mae mwy o hyfforddiant ar gael hefyd.

"Mae'r cyngor wedi dysgu gwersi wedi'r digwyddiad trasig yma, ac wedi gwneud popeth o fewn ein gallu i sicrhau nad yw hyn yn gallu digwydd eto."