Rwanda -Covid: Uwandikiye Kagame ku kibazo cy’abana batigaga avuga ko ‘asubijwe’

Minisiteri y'uburezi mu Rwanda yatangaje ko abana b'incuke n'abiga mu myaka itatu ya mbere y'amashuri abanza nabo bazasubira ku ishuri kuva tariki 18/01/2021.

Ni inkuru yashimishije ababyeyi. Benshi bari bamaze igihe bagaragaza akababaro ko abana babo batiga, mu gihe abandi bangana nabo bo mu mashuri yitwa mpuzamahanga mu Rwanda bo bigaga.

Nyuma y'iki cyemezo gishya, Jean Paul Ndayisabye uheruka kwandikira ibaruwa Perezida Paul Kagame, yabwiye BBC ko yishimye, kandi ko yumva ibaruwa ye "isubijwe".

Ati: "Ariko bijye bikorwa bitabaye ngombwa ko perezida yitabazwa".

Kuva mu kwa 11/2020 amashuri yongeye gufungura nyuma y'amezi arindwi afunze kubera Covid, gusa abiga amashuri y'incuke n'imyaka itatu ibanza kugeza ubu bagomba kuguma mu rugo.

Uyu munsi kuwa kane minisiteri y'uburezi yatangaje ingengabihe y'ibihembwe bitatu baziga kugeza mu kwa cyenda uyu mwaka.

Mu kiganiro n'abanyamakuru, Minisitiri w'uburezi Valentine Uwamariya yavuze ko ubwo bafungaga amashuri bumvaga ko azafungurwa bidatinze.

Avuga ko nyuma y'amezi umunani, uburezi ari rwo rwego rw'ubuzima rufunguye nyuma y'izindi zose.

Uwamariya yavuze ko umwaka wa 2020 wabaye umwaka mubi cyane mu rwego rw'uburezi

Ndayisabye usanzwe ukora ubucuruzi buciriritse, we avuga ko nta mpamvu nimwe yagombaga kubuza iki cyiciro cy'abana kwiga "kuko n'abandi babemereye [kwiga] imibare y'abanduye [Covid] iri hejuru".

Abantu batandukanye ku mbuga nkoranyambaga bagaragaje ko bishimiye ko iki cyiciro cy'abana kigiye gusubira ku ishuri, ariko basaba ko hongerwa abarimu kugira birinde kwiga mu bucucike.

Itangazo rya minisiteri y'uburezi risobanuye ko ubu amashuri yose mu Rwanda agiye kwiga, nubwo imibare y'abandura n'abicwa na coronavirus imaze iminsi izamuka cyane.