Abandi batanu batawe muri yombi bakekwaho uruhare mu bujura bwabereye muri Louvre i Paris
Ahavuye isanamu, Reuters
- Umwanditsi, Kathryn Armstrong
- Igikorwa, BBC News
- Yatangajwe
- Igihe co gusoma: iminota 2
Ubushinjacyaha bwa Paris bwatangaje ko abandi bantu batanu batawe muri yombi bakurikiranyweho uruhare mu bujura bwabereye mu nzu ndangamurage ya Louvre.
Umushinjacyaha Laure Beccuau yavuze ko abo bantu batawe muri yombi mu ijoro ryo ku wa gatatu mu gace ka Paris.
Aba babonetse nyuma y'uko abandi bagabo babiri bafashwe bacyekwaho ubujura bwabaye ku itariki ya 19 y'uku kwezi kw'Ukwakira (10) uyu mwaka, ubwo bane binjiraga muri iyi nyubako ya Louvre ku manywa, bakiba ibintu bifite agaciro ka miliyoni 88 z'amayero (ni ukuvuga miliyari hafi 148 z'amafaranga y'u Rwanda).
Ahavuye isanamu, Musée du Louvre
Ntibisobanutse uruhare aba bashya bacyekwaho kugira muri ubwo bujura. Ariko kuri uyu wa kane, umushinjacyaha Beccuau yabwiye radiyo ya RTL yo mu Bufaransa ko "amaherezo bashobora kutubwira ukuntu ibi byabaye".
Beccuau yavuze ko aba batawe muri yombi mu duce tw'i Paris no mu nkengero zayo, harimo no mu gace ka Seine-Saint-Denis ko mu nkengero ya Paris.
Yongeyeho ko telefone n'ibindi bikoresho byasanganywe abacyekwa mu gihe bafatwaga, birimo gufasha abakora iperereza kwiga (gutahura) ibikubiye mu butumwa bwo guca amarenga (burimo kuzimiza) bwafashwe.
Abatawe muri yombi bashobora gufungwa iminsi igera kuri ine, nyuma bakaba bashyirirwaho ibirego cyangwa bakarekurwa.
Kuva ubwo bujura bubaye, imwe mu mirimbo y'agaciro kanini cyane yo mu nzu ndangamurage ya Louvre yimuriwe muri Banki y'Ubufaransa. Iyo mirimbo izajya ibikwa mu bubiko bucungiwe umutekano cyane, buri muri metero 26 munsi y'ubutaka, mu biro bikuru by'iyo banki biri rwagati mu mujyi wa Paris.
