Inter na fatan daukar Serie A na bana a kan Milan na 20 jimilla
Asalin hoton, Getty Images
AC Milan za ta karbi bakuncin Inter Milan a gasar Serie A, ranar Litinin a karawar hamayya ta 'yan birnin Milan a San Siro.
Wannan shi ne wasa na biyu da za su fuskanci juna a Serie A a bana, bayan da Inter ta ci 5-1 ranar 16 ga watan Satumbar 2023.
Inter ta ci kwallayen ta hannun Henrikh Mkhitaryan da ya zura biyu da Marcus Thuram da Hakan Calhanoglu a bugun fenariti da kuma Davide Frattesi, wanda ya ci na biyar a raga.
Ita kuwa Milan ta zare daya ta hannun Rafael Leao a wasan na hamayya na 'yan birnin Milan masu wasa a San Siro.
Inter na fatan daukar Scudetto na bana, kuma a karon farko a kan Milan a tarihin babbar gasar tamaula ta Italiya.
Inter ce ta daya a kan teburi da tazarar maki 14 tsakaninta da Milan, kuma saura wasa shida a karkare kakar bana.
Wasa daya Inter za ta ci ta dauki Scudetto na bana, kuma za ta lashe da wuri tun kan kammala kakar nan, kamar yadda Napoli ta yi a bara.
Cikin wasa 32 da ta buga a lik ta ci 26 da canjaras biyar aka doke ta wasa daya a bana, kaka ta hudu a tarihi da ta yi irin wannan namijin kokari a babbar gasar tamaula ta Italiya.
Karawa dayan da aka doke ta a lik ita ce 2-1 da Sassuolo ta yi nasara a San Siro ranar Laraba 27 ga watan Satumbar 2023.
Simone Inzaghi, wanda ya fara aikin horar da Inter ranar 7 ga watan Yulin 2021 na daf da lashe Serie A na farko a tarihi, kuma na 20 da kungiyar za ta dauka jimilla.
Kenan Inter za ta lashe Scudetto na 20, za ta zama ta biyu a Italiya, bayan Juventus da za ta saka tauraruwa ta biyu a gaban rigarta.
Haka kuma Inter ta zura kwallo a raga a wasa 40 a Serie A, saura karawa hudu a gabanta ta kamo bajintar Juventus da ta yi.
Inter mai maki 83 ta ci kwallo 77 an zura mata 17 a raga, yayin da Milan ta biyu mai maki 69 ta ci 63 an kuma zura mata 37 a raga kawo yanzu.
Haka kuma wasa biyar baya Inter ce ke nasara a kan Milan, amma a wannan karon da zarar an doke Milan kenan Inter za ta lashe Scudetto na bana kenan.
Jerin wadanda suka lashe Serie A
- Juventus FC 36
- AC Milan 19
- Inter Milan 19
- Genoa 9
- Torino 7
- Bologna 7
- Pro Vercelli 7
- Napoli 3
- AS Roma 3
- Lazio 2
- Fiorentina 2
- Sampdoria 1
- Hellas Verona 1
- Cagliari Calcio 1
- FBC Casale 1
Asalin hoton, Getty Images
Wadanda suke kan gaba a cin kwallaye a Serie A:
- Lautaro Martinez Inter Milan 23
- Dusan Vlahovic Juventus 16
- Albert Gudmundsson Genoa 13
- Victor Osimhen Napoli 13
- Olivier Giroud AC Milan 13
- Paulo Dybala AS Roma 12
- Duvan Zapata Torino 12
- Marcus Thuram Inter Milan 11
- Hakan Calhanoglu Inter Milan 11
- Teun Koopmeiners Atalanta 11
- Romelu Lukaku AS Roma 11
