Seirbheisean dheth air sgàth bhìorais
- Air fhoillseachadh
Tha an Lord of the Isles na tàmh.
Bidh buaidh air cuid de sheirbheisean Chaledonian Mhic a' Bhriuthainn gu deireadh na seachdain air sgàth bhìorais a bhual air luchd-obrach air an MV Lord of the Isles.
Thàinig e am bàrr Dimàirt gun robh sianar a tha ag obair air a' bhàta bochd.
Chaidh am bàta a thoirt a-mach à seirbheis gus an tèid a glanadh agus tha Cal Mac an dòchas gum bi i a' sèoladh a-rithist aig an deireadh-sheachdain.
Thuirt iad gu bheil iad duilich mun t-suidheachadh agus nach eil duine den luchd-siubhail a bha air an Lord of the Isles air fàs bochd, cho fad is tha fios aca.
Chaidh seirbheisean a chur dheth Dimàirt is Diciadain mar thà is dh'innis Cal Mac cuideachd nach bi seirbheis ann Diardaoin aig 09.00 eadar an t-Òban is Colbhasa no aig 11.55 eadar Colbhasa is an t-Òban.
Cha bhi seirbheis ann nas motha eadar an t-Òban, Loch Baghasdail is Barraigh aig 15.40 Diardaoin no aig 07.00 Dihaoine eadar Barraigh, Loch Baghasdail agus an t-Òban.
Tha seirbheis a bharrachd eadar An Àird Mhòr ann am Barraigh agus Èirisgeidh oidhche Chiadain mu 19.15.
Chan eil an gnothach a' toirt buaidh air seòlaidhean a' Chlansman eadar an t-Òban is Bàgh a' Chaisteil.
