Cleasaiche Katy Morag ga taghadh

Chaidh nighean òg à Glaschu a thaghadh airson pàirt Katy Morag a chleas ann an sreath ùr a bhios air CBeebies.

Chuir na ceudan de chaileagan òga a-steach airson a' phàirt a chluich.

Tha an nighean a fhuair a' phàirt, air a bheil Cherry, seachd bliadhna de dh'aois, agus tha ceangal aice ri Leòdhas.

Chuir cho coltach 's a tha i ri Katy Morag mar a nochd i anns na leabhraichean le Mairi Hedderwick, iongnadh mòr air an sgioba fastaidh.

Chaidh agallamhan a chumail airson na pàirt ann an Glaschu, Dùn Èideann agus Steòrnabhagh.

"Bha mi dìreach air mo dhòigh nuair a chuala mi gun robh mi air a' phàirt fhaighinn, 's cha b'urrainn dhomh sguir a' leum mun cuairt," thirt Cherry.

"Tha mi air na leabhraichean air fad a leughadh, agus 's toil leam iad gu mòr mòr.

"Tha mi air a bhith a' tighinn a Leòdhas air mo shaor-làithean o chionn bhliadhnaichean, 's tha fadachd orm tòiseachadh air fiolmadh!" thuirt i.

Tòisichidh am fiolmadh deireadh a' Ghiblein ann an Leòdhas, agus bidh e a' dol chun an Lùnastail.