Maill air obair-càraidh Drochaid Cheasaig

Tha dùil gum bi gach taobh air tè de na drochaidean as motha air a' Ghàidhealtachd fosgailte aig deireadh na mìos.

Thàinig dàil trì seachdainnean air an obair-càraidh air drochaid Cheasaig.

Bidh 30,000 càr a' dol tarsainn na drochaid gach là.

An-uiridh, dh'innis Còmhdhail na h-Alba gum feumadh iad obair-càraidh fìor-riatanach a dhèanamh air structair na drochaide, air chosgais £13m.

Thòisich an obair-càraidh sa Ghearran.

Chaidh innse gum biodh an rathad gu tuath dùinte fad 17 seachdainnean, ach cha deach fhosgladh fhathast.

Thuirt labhraiche do Bear Scotland gun do chuir an t-sìde fhliuch aig toiseach na bliadhna maill air chùisean.

Thuirt e cuideachd gun robh e an dòchas nach biodh maill air gnothaichean an ath-bhliadhna, nuair a bhios taobh eile na drochaide, an rathad gu deas, dùinte fad ceithir mìosan.