Fiolm mu fhear-siridh na h-Àirce

Tha fireannach air feuchainn ri lorgan a bhràthair a leantainn mus deach e air chall 's e a' coimhead airson Àirce Noah.

Chaidh fios a chur gun robh Dòmhnall MacCoinnich, 47, à Leòdhas a dhìth air 14mh den Damhair 2010.

Cha do thill e bho thuras gu Beinn Ararat anns an Tuirc.

Thèid an oidhirp aig Derick MacCoinnich gus faighinn a-mach dè dh'èirich dha a bhràthair a shealltainn ann am prògram air BBC ALBA Oidhche Ardaoin.

Tha Mgr MacCoinnich den bheachd gun deach a mharbhadh le ceannaircich, gun tug gadaiche ionnsaigh air no gun robh tubaist aige anns na beanntan.

Ghabh Dòmhnall ùidh ann a bhith a' lorg Àirce Noah is e tràth anns na 40an.

Tha am Bìoball ag ràdh gu bheil an Àirce ann am beanntan Ararat.

Tha Mgr MacCoinnich an dòchas gun toir am prògram air daoine a thighinn air adhart le fiosrachadh agus gum faic ùghdarrasan na Tuirce e.

Thèid am prògram - My Brother the Ark Raider - a shealltainn air BBC Alba aig 9:00f Oidhche Ardaoin.