Cidhe na Comhairle ga fhoillseachadh

Dh'fhoillsich Comhairle na Gàidhealtachd planaichean connspaideach 'son cidhe-bogadain a thogail faisg air Taigh-cluiche Eden Court.

'S e pìos ealain a bhiodh sa chidhe, a rachadh suas is sìos nuair a sheasadh daoine air.

Tha a' Chomhairle air 'An t-Àite Cruinneachaidh' a ghabhail air.

Chosgadh an cidhe £750,000 is Alba Chruthachail mar thà air £300,000 a ghealltainn.

Thigeadh an còrr bho Chomhairle na Gàidhealtachd, Maoin Choitcheann Inbhir Nis agus HIE.

Tha cuid air na planaichean a chàineadh ge-tà, is iad ag ràdh gur e faoineas a tha seo aig àm nuair a tha an sporan poblach gann.

Dh'fhàg na ceudan de luchd-obrach na Comhairle an dreuchdan is an t-ùghdarras a' feuchainn ris na milleanan notaichean a chùmhnadh.

Chuir a' Chomhairle plana air adhart an toiseach an cidhe a stèidheachadh air Sràid Hunndaidh sa bhaile.

Dhearbh iad Diluain gu bheil iad a-nise 'son a thogail ri taobh Eden Court.

Tha iad ag ràdh gum biodh an cidhe a' tàladh luchd-turais a dh'Inbhir Nis.