"Chan fhulang sinn mì-mhodh" - Rae
- Air fhoillseachadh
Shoirbhich le ICT ann am Brechin Disathairne, ach bha buaireadh ann far na pàirce.
Thuirt cathraiche Chaley Thistle, Graham Rae, nach fhulang an cluba mì-mhodh bho luchd-leantainn, is cuid ri buaireadh aig Pàirce a' Ghlìb Disathairne.
'S e deagh là a bh' ann do Chaley Thistle air a' phàirc is iad a' buannachadh 4-0 an aghaidh Brechin City.
B' e seo a' chiad 3 puingean aca den t-seusan ùr.
Dh'innis Mgr Rae, ge-tà, gun do rinn buidheann bheag de luchd-taic Inbhir Nis maslachadh air a' chluba leis an dol a-mach aca.
Thuirt Mgr Rae gun robh an luchd-taic tàireil is bagairteach nan dòigh.
Dh'innis e gu bheil riochdaire an SPFL aig a' gheama a-nise air fios a chur air ICT mun chùis.
Thuirt e cuideachd gun do thog luchd-leantainn eile bho Inbhir Nis a bha ann am Brechin draghan mu dhol a-mach na buidhne, is gun tàinig gearan bhon chompanaidh bus D & E gun deach carbad leotha a sgrios leis a' bhuidhinn às dèidh a' gheama.
Fòghnaidh na dh'fhòghnas, tha Mgr Rae ag ràdh.
Mhìnich e gu bheil an cluba air fianais a chruinneachadh is gu bheil iad deiseil feadhainn a bha ri àimhreit a chasg bho gheamaichean.
