An Transocean Winner ann an Leòdhas
- Air fhoillseachadh
Dh'fhoillsich Meur Rannsachaidh nan Tubaistean Mara (MAIB) aithisg, taobh a-muigh air an Transocean Winner, a chaidh air na creagan aig tràigh Dhail Mhòir air taobh siar Leòdhais tràth sa mhadainn air an 8mh den Lùnasdal 2016.
Bha an clàr-ola ga thoirt bho Nirribhidh gu Malta nuair a bhrist an loidhe le ALP Forward, a bha ga shlaodadh, ann an stoirm.
Cha robh e follaiseach an toiseach dè cho fada 's a bhiodh an Transocean Winner air a ghlacadh air na creagan.
Air a' cheann thall, thug e trì seachdainean mus deach an clàr-ola a thoirt far na creagan agus a chur air bhog - gu ìre, a-rithist.
Shoirbhich leis an iomairt sin, is dh'fhàg an clàr-ola tràigh Dhail Mhòir
Chaidh an Transocean Winner an uairsin air chuairt timcheall Leòdhais.
Fhuair i dachaidh ùr aig acarsaid anns an Loch a Tuath.
Nochd an uairsin bàta mòr, Hawk, 'son a' chlàir-ola a ghiùlain air falbh.
Às dèidh iomairt, chaidh an Transocean Winner a thogail air bòrd Hawk.
Air an 14mh là den Damhair, dh'fhàg an clàr-ola soraidh slàn air Eilean Leòdhais.
Chaidh a thoirt an toiseach a Mhalta, is an uairsin dhan Tuirc.
Chaidh an Transocean Winner an uairsin a thoirt às a chèile - is am pìos mu dheireadh ga leaghadh tràth san Fhaoilleach 2016.
Tha an MAIB a-nise air laigsean mòra a nochdadh leis an ullachadh a rinn a' chompanaidh ALP, a bha a' slaodadh a' chlàir-ola mus deach e air na creagan, mar a làimhsich iad an gnothach, is cuid den uidheamachd a bh' aca.
