An "Chennai Six" saor

Fhuair sianar Bhreatannach saorsa an dèidh ceithir bliadhna ann am prìosan Ìnnseanach.

Tha Billy Irving às a' Choingheal ann an Earra-Ghàidheal am measg an "Chennai Six" mar a thugar orra.

Thuirt a leannan, Yvonne NicUisdein, a bhruidinn ris air a' fòn sa mhadainn Dimàirt, gu bheil e an dòchas a bhith dhachaigh ron deireadh-sheachdain.

Chaidh an saoradh Diluain bho chasaidean co-cheangailte ri gunnaichean.

Chaidh Billy Irving agus na fireannaich eile a chur an grèim ann an 2013.

Bha iad air a bhith ag obair a' cur dìon air soithichean marsanta bho spùinneadairean.

Chuireadh fo chasaid iad gun robh armachd aca ann an uisgeachan nan Ìnnseachan gun chead - rud a chaidh iad às àicheadh.

Chaidh an dìteadh, agus an cur dhan phrìosan fad còig bliadhna.

Ach chuir cùirt anns na h-Ìnnseachan às don dìteadh Diluain, an dèidh dhaibh ceithir bliadhna a chur seachad fo ghlais.