Faochadh do Chomhairle na Gàidhealtachd

Tha Comhairle na Gàidhealtachd am measg na tha air fàilte a chur air an naidheachd nach tèid cìsean a bharrachd a chur air buidhnean a tha a' toirt seachad seirbheisean cultarail agus spòrs do dh'ùghdarrasan ionadail.

Bhathas a' moladh faochadh do bhuidhnean gan leithid a stad.

Mhol aithisg Bharclay as t-samhradh gun rachadh cìsean a chur air buidhnean a tha a' toirt seachad seirbheisean cultarail agus spòrs do chomhairlean, mar High Life Highland air a' Ghàidhealtachd.

Bha draghan air nochdadh gum fàgadh sin gun rachadh cuid de sheirbheisean a chall, air neo gun rachadh cosgaisean dhan phoball an àirde.

Dh'innis an Riaghaltas ge-tà nach tèid am moladh seo a chur an sàs.

Chuir Comhairle na Gàidhealtachd is High Life Highland fàilte air sin.

Thuirt a' chomhairle gun robh iad air na draghan a thogail leis an Riaghaltas, is nam biodh seo air a dhol troimhe, gum biodh iad air cha mhòr £2m a bharrachd a chall gach bliadhna aig àm nuair a tha suidheachadh ionmhais glè dhoirbh aca mu thràth.