''Thoiribh piseach air cùram do sheann-daoine''
- Air fhoillseachadh
Chaidh iarraidh air Bòrd-Slàinte na Gàidhealtachd piseach a thoirt air cùram do sheann daoine aig Ospadal an Ràthaig Mhòir.
Chaidh iarraidh air Bòrd-Slàinte na Gàidhealtachd cùram do sheann daoine a leasachadh.
Tha an naidheachd a' tighinn agus Buidheann Slàinte na h-Alba a' dèanamh sgrùdaidh air dòighean-obrach na buidhne aig Ospadal an Ràthaig Mhòir am baile Inbhir Nis.
Bha luchd-sgrùdaidh ann an iomadach uàrd - Uàrd 2A anns a bheil euslaintich air an tàinig stròc; Uàrd 2C far a bheil seann daoine; Uàrd 3A ortopàideach agus Uàrd 6A far a bheil measaidhean meidigeach air an dèanamh.
Bha iad cuideachd ann an roinn Tubaiste agus Èiginn.
Fhuair iad gun robh mòran sheirbheisean san ospadal aig àrd-ìre.
Ach dh'innis iad nach robh planaichean cùraim aig mòran euslainteach a bha ag innse ann an da-rìribh dè an cùram a bha a dhìth orra.
Uile gu lèir, tha sia molaidhean aca dhan bhòrd-shlàinte.
Thuirt fear-labhairt a' bhùird gu bheil an aithisg na briseadh-dùil dhaibh, ach gu bheil iad ag obair gus rudan a chur an gnìomh ann an ùine nach bi fada a bheir piseach air a' chùram a tha seann daoine a' faotainn.
