Dòchas do Mhargaidh Sprèidh Steòrnabhaigh

Tha cùisean nas dòchasaiche do Mhàrgaidh Sprèidh Leòdhais 's na Hearadh às dèidh coinneimh èiginn oidhche Luain.

Chaidh a' choinneamh a ghairm is gainnead dhaoine a bha deònach dreuchdan sa bhuidhinn a ghabhail os làimh.

Dh'fhàg sin cuid a' ceasnachadh am biodh e comasach fèilltean a bhith ann an Steòrnabhagh tuilleadh.

Nochd timcheall air 50 duine aig a' choinneimh èiginn is chaidh na dreuchdan a bha bàn a lìonadh.

"Bha coinneamh mhath dha-rìribh ann is fhuair sinn daoine airson na h-obraichean seo a dhèanamh", thuirt Ailig Dòmhnallach, a tha na bhall de chomataidh na margaidh.

"Leis a sin, thèid againn a-nise ri coimhead air adhart ri fèilltean a bhith againn a-rithist ann an Steòrnabhagh am-bliadhna", thuirt e.

Ach ged a 's e faochadh a bha sin, tha Mgr Dòmhnallach ag ràdh gu bheil feum fhathast air taic a bharrachd.

Bhiodh seo gu sònraichte feumail air là nam fèilltean.

"Chì thu an-còmhnaidh na h-aon daoine a tha a' dèanamh na h-obrach fad an t-siubhail.

"Tha iad a' dèanamh seo gun phàigheadh, a' gabhail là far na h-obrach, agus bhiodh e math nan rachadh againn air barrachd dhaoine fhaighinn airson nan daoine sin a chuideachadh air là nam fèilltean", thuirt e.