Linn ùr sa Gharbh Allt

Tha coimhearsnachd ann an Cataibh a' comharrachadh Diardaoin gun d' fhuair iad sealbh oifigeil air 3,000 acair de thalamh.

Cheannaich Iomairt Choimhearsnachd a' Gharbh Uillt am fearann, a tha faisg air Bun Ilidh, bho Oighreachdan Chataibh.

Bha Oighreachdan Chataibh gu h-eachdraidheil gu mòr an lùib nam fuadaichean a bha san sgìre.

Tha sealbh a-nis aig Iomairt Choimhearsnachd a' Gharbh Uillt air bailtean Marrel, Port Gower, Bun Ilidh an Iar, agus Gartaidh Mòr agus an talamh ionaltraidh a tha nan cois.

Thuirt Anne Scott bhon bhuidhinn gu bheil iad a' comharrachadh linne ùire dhan sgìre agus dhan t-sluagh.

"Tha taic mhòr anns a' choimhearsnachd", thuirt i.

"Faodaidh sinn bruidhinn a-nise mu rudan a tha sinn airson dèanamh san àm ri teachd, na cothroman a th' ann. Cha robh còmhradh mar sin againn roimhe.

"Bidh sinne a' cuimhneachadh air na daoine a bh' ann agus an ceangal ris na fuadaichean", thuirt i.

Mar phàirt den sin, tha iad air bòrd fiosrachaidh a chur aig carragh-cuimhne Lìog an Fhearainn san sgìre.

Chosg e timcheall £250,000 am fearann a cheannach.

Fhuair a' choimhearsnachd taic bho Stòras Fearainn na h-Alba, am measg eile.