Trioblaidean a' leantainn aig an Rest
- Air fhoillseachadh
Tha an A83 fhathast dùinte aig an Rest and be Thankful ann an Earra Ghàidheal às dèidh mhaoim-slèibhe Dimàirt.
Thuirt a' bhuidheann BEAR Alba gun deach a' mhòr-chuid den spruilleach a ghlacadh anns na feansaichean mòra a th' ann airson dèiligeadh ri maoimean-slèibhe.
Thuirt iad gun robh mu 2,500 tunna de pholl is clachan ann.
Fhuair cuid dheth chun an rathaid ge-tà, is ràinig pàirt dheth seann rathad an airm ann an Gleann a' Chrò.
Rannsachadh
Bithear a' cleachdadh rathad an airm mar shlighe èiginn nuair a tha an A83 dùinte, ach chan eil sin comasach aig an ìre seo.
Thuirt BEAR Alba gu bheil feum air làn rannsachadh air cliathach na beinne agus an uairsin obair-sgioblachaidh mus fhosgail an A83 a-rithist.
Tha slighe eile tron Chrìon-Làraich air a comharrachadh gu dràibhearan, ach cuiridh seo 60 mìle ris an turas.
