Plana "radaigeach" airson na Gàidhlig

Tha am buidheann-iomairt 'Misneachd' air pàipear fhoillseachadh agus iad ag ràdh gur e plana radaigeach a th' ann airson na Gàidhlig.

Tha dragh mòr orra gu bheil a' Ghàidhlig a' lagachadh gu luath mar chànan coimhearsnachd.

Tha iad gu sònraichte a' togail air aithisg air rannsachadh a chaidh a dhèanamh ann an Siabost ann an Leòdhas.

Tha iad fhèin a' canail gu bheil seo a' sealltainn an staing anns a bheil an cànan, ach nach robh guth air ann am Plana Cànain Nàiseanta na Gàidhlig (2018- 2023).

Tha am buidhean a' cleachdadh nam molaidhean ann an aithisg Shiaboist mar bhun-stèidh airson a' phlana aca fhèin.

Cànan a' crìonadh

Tha dragh mòr orra mu ghluasad cànain - bho Ghàidhlig gu Beurla agus gu bheil sin a tachairt nas luaithe na bha e a-riamh roimhe.

Tha iad dhen bheachd gum bi an cànan marbh gu ìre mhòr an ceann ginealach neo dhà, mura tig atharrachadh mòr.

Canaidh iad nach eil Riaghaltas na h-Alba neo Bòrd na Gàidhlig a' gabhail feart air an seo agus gu bheil poileasaidhean Gàidhlig lag agus nach eil iad èifeachdach.

Tha iad ag amas gum bi Gàidhlig aig a h-uile duine ann an sgìrean Gàidhlig - agus gum bu chòir foghlam tro mheadhan na Gàidhlig a bhith ann airson a h-uile pàiste.

Dha inbhich aig nach eil an cànan, tha iad a' moladh gum bi sia mìosan de bhogadh ann an Gàidhlig ri fhaotainn saor san asgaidh.

A bharrachd air a sin, bu chòir coimiseanair cànain Gàidhlig a thoirt a-staigh le cumhachdan laghail, làidir airson còirichean a' chànain a dhìon.

Tha an aithisg gu lèir ri fhaotainn an seo: http://www.misneachd.scot/, taobh a-muigh