''Fàgaidh daoine Muile ri linn droch sheirbheis aiseig''

Thuirt Comhairle Choimhearsnachd Mhuile gun cuir daoine cùl ris an eilean air sgàth 's cho truagh 's a tha clàr-ama a' gheamhraidh.

Aig àrd an t-samhraidh, tha bàt'-aiseig a' dol eadar an t-eilean agus tir-mòr bho mhoch gu dubh.

Ach, nuair a thòisicheas clàr-ama a' gheamhraidh air an 22mh dhen Dàmhair, cha bhi ach ceithir seòlaidhean sa là ann.

"'S e gòraich a th' ann nach bi aiseag ri fhaotainn dhan Òban ro 9.00m", thuirt fear-cathrach na comhairle coimhearsnachd, Uilleam MacLaomainn.

Dh'innis Mgr MacLaomainn gu bheil tòrr dhaoine a' frithealadh ospadal ann am baile Ghlaschu agus gun tig orra àite-fuirich a chur air dòigh leis agus nach fhaigh iad dhachaigh às dèidh 4.00f.

''£600,000''

Tha e coltach gun do dh'iarr a' choimhearsnachd gum biodh barrachd sheòlaidhean ann air a' gheamhradh seo.

Ach thuirt iad gun do dhiùlt Còmhdhail Alba sin a dhèanamh.

Tha Ealasaid NicFheargais bho Chomataidh Bàt'-aiseig Mhuile agus Eilean I a' dèanamh dheth gun cosg ceithir seòlaidhean a bharrachd san t-seachdain £600,000.

Dh'fhàgadh sin, thuirt i, gum faigheadh muinntir an eilein air an là a chur seachad air tìr-mòr.

Tha Anndra Knight, aig a bheil fear dhe na gnìomhachasan as motha san eilean, ag ràdh gum faodadh gun tig orra an t-eilean fhàgail ri linn suidheachadh a' bhàt'-aiseig.

Chuir e ris a' sin agus e a' canail gu bheil e "a' sior fhàs doirbh beatha agus beò-shlàint' a dhèanamh ann am Muile''.

Thuirt fear-labhairt bho Chaledonian Mac a' Bhruthainn gun deach grùnn mholaidhean a chur air adhart airson 's gum biodh barrachd sheirbheisean ann eadar Muile agus an t-Oban air a' gheamhradh seo.