Rinn teine sgrios air oifis urrais an Leòdhas
- Air fhoillseachadh
Chaidh an togalach a sgrios san teine
Thòisich an teine aig oifis Urras Oighreachd Ghabhsainn ann an uairean beagan na maidne.
Chaidh luchd-smàlaidh a ghairm chun na làraich san iar-thuath den eilean goirid às dèidh 01:30m.
Bha ceithir innealan-smàlaidh an sàs san oidhirp an teine a chur às.
Chaidh an togalach a leagail le diogair.
Chaidh Urras Oighreachd Ghabhsainn a stèidheachadh ann an 2007 airson an oighreachd a ruith às leth na coimhearsnachd eadar Barabhas Uarach agus Port Nis.
Aithris Aonghais Dhòmhnallaich air Aithris na Maidne.
Chaidh oifis an urrais air iomall baile Ghabhsainn fhosgladh ann an 2011.
Ged a tha obair an urrais san là an-diugh air a cumail ann an stòras air-loidhne, thuirt an cathraiche, Agnes Rennie, gun do chaill iad mòran de sheann phàipearan agus clàran a bha a' buntainn ri eachdraidh na h-oighreachd.
Thuirt i gun robh i taingeil nach deach duine a ghoirteachadh san teine.
Bha 13 duine ag obair san togalach agus thuirt a' Bh-Ph. Rennie gun d' fhuair iad mòran thairgsean bho dhaoine a' tabhann àite dhaibh far am faod iad leantainn orra le obair an urrais.
Tha an t-seirbheis smàlaidh ag ràdh gu bheil an rannsachadh aca air dè a bu choireach ris an teine a' leantainn.
