Iomairt cobhair a' leantainn an Ratharsair

Tha na buidhnean cobhair air a bhith a-muigh a-rithist Dimàirt ann an Ratharsair a' coimhead airson fireannaich, 72, nach fhacas bho Là na Sàbaid.

Chaidh Alasdair Lovie, air a bheil seargadh inntinn, fhaicinn mu dheireadh tuath air Inbhir Àrois, faisg air seann mhèinn mu 11:00m.

Tha na Poilis, na Maoir-Chladaich agus luchd-smàlaidh, sgioba cobhair le coin agus buill Sgioba Teasairginn nam Beann às an Eilean Sgitheanach, uile air a bhith an sàs san iomairt gus lorg fhaighinn air Mgr Lovie.

Tha bàta teasairginn Phort Rìgh agus am bàta-aiseig aig Caledonian Mac a' Bhriuthainn cuideachd air a bhith ag aiseag an luchd-teasairginn a-null agus a-nall eadar Ratharsair agus an t-Eilean Sgitheanach.

Tha na Poilis den bheachd gum faodadh gun deach Mgr Lovie air chall agus tha iad ag iarraidh taic bho dhuine sam bith a dh'fhaodadh air fhaicinn.

Tha e 5'10" de dh'àirde, le falt donn agus sùilean gorma. Bha seacaid dhubh, briogais denim, ad dhubh, leine ghorm agus geansaidh dearg air.

Chaidh iarraidh air eileanaich coimhead sna seadaichean agus togalaichean eile aca feuch a bheil e ann.

Thuirt an t-Insp. Bruce Crawford bho Phoileas Alba: "Tha sinn a' sìor fhàs draghail mu chor Alasdair mar as fhaide a tha e gun sgeul againn air, agus tha fios againn gu bheil muinntir an àite a' faireachdain mar seo cuideachd.

"Tha dementia air Alasdair agus tha teansa ann gun do dh'fhàs e troimhe chèile fhad 's a bha e a-muigh a' coiseachd.

"Chunnacas mu dheireadh e aig seann mhèinn tuath air Inbhir Àrois ach tha e fut agus tric a' falbh air chuairt agus, mar sin, tha mi ag iarraidh air daoine ann an Ratharsair a bhith furachail agus innse dhuinn mu chàil a dh'fhaodadh ar cuideachadh ann a bhith ga lorg.

"Tha sinn cuideachd airson agus gum bi dràibhearan air am faiceall agus sùil as ùr a thoirt air dealbhan dashcam a dh'fhaodadh a bhith aca."