Briseadh sa chàball-mhara a dh'fhàg Leòdhas is na Hearadh gun dealan

'S e briseadh sa chàball-mhara a dh'fhàg Leòdhas is na Hearadh gun dealan Dihaoine 16mh den Dàmhair.

Chaill 13,600 de luchd-cleachdaidh SSE cumhachd an dealain madainn Dihaoine, ach chaidh aig a' chompanaidh ri a thoirt air ais thuca uile taobh a-staigh dà uair de thìde.

Chuir iad heileacoptair chun na sgìre airson sgrùdadh a dhèanamh air na loidhneachan dealain feuch dè a bu choireach ris a' ghearradh.

Chan ann air an talamh, ge-tà, a bha an trioblaid ach aig muir sa chàball 33,000 volt a tha a' toirt dealain à tir-mòr chun nan Eilean Siar.

Dhearbh SSE gu bheil briseadh, mu 15 cilemeatair bhon chladach ann an uisge domhainn, sa cheangal a tha 32 cilemeatair de dh'fhaid agus tha a' dol bhon Àird Mhòir san Eilean Sgitheanch gu na Hearadh.

Thuirt a' chompanaidh nach d'fhuair iad càil ceàrr leis a' chàball nuair a rinn iad sgrùdadh as t-samhradh.

Thòisich iad rannsachadh air dè bu choireach ris a' bhriseadh agus airson plana a dhealbh.

Chan eil fhios aca an gabh an càbal càradh neo am feum iad fear ùr a chur ann.

Chan eil seo a' toirt buaidh air daoine ann an Leòdhas agus na Hearadh leis gur e Stèisean Cumhachd a' Bhataraigh ann an Steòrnabhagh agus tuathan-gaoithe san sgìre fhèin a tha a' cumail dealain riutha.

Luchd-cruthachaidh ionadail

Ge-tà, tha seo na dhuilgheadas do chompanaidhean eileanach a tha a' cruthachadh dealain leis nach fhaigh iad air a chur chun a' ghriod nàiseanta.

Thuirt SSE gu bheil iad a' conaltradh leis na buidhnean sin feuch a' bhuaidh a bheir an suidheachadh seo air an obair aca a lùghdachadh.

Thuirt iad gum foillsich iad toradh an sgrùdaidh nuair a bhios e deiseil agus nuair a bhios plana aca air dè am fuasgladh as fheàrr.