Cha tèid Fèis Cheilteach Innse Gall 2021 air adhart

Cho-dhiùn stiùirichean Fèis Cheilteach Innse Gall (HebCelt) nach tèid a cumail airson na dàrna bliadhna sreath a chèile.

Chaidh fèis 2020 a chur dheth air sgàth èiginn Covid, agus leis nach eil fhios mar a bhios cùisean am meadhan an t-samhraidh thuirt iad nach tachair i am-bliadhna a bharrachd.

Thuirt iad gum faigh daoine a cheannaich tiocaidean an t-airgead air ais.

Tha iad an dòchas, ge-tà, tachartas air choireigin a chur air dòigh uaireigin am-bliadhna, cuirmean beò air-loidhne 's dòcha, coltach ris an fhèis bhiortail a bh' aca an-uiridh.

Thuirt tè de stiùirichean na fèise, Eilidh Laing, gur e co-dhùnadh uabhasach doirbh a bh' ann dhaibh.

"Bha sinn a feitheamh airson fhaicinn mar a bha cùisean gu bhith, ach 's e bhith a' cumail ar coimhearsnachd sàbhailte an rud cudromach.

"Tha sinn air tòiseachadh air airgead a thoirt air ais do dhaoine a th' air tiocaidean a cheannach.

"A thaobh fèis 2022, feumaidh sinn rud beag de dhòchas a bhith againn, ach chan eil sinn a' dearbhadh gu bheil rud sam bith cinnteach fhathast."

Tha an fheadhainn air cùl na fèise-ciùil as motha air a' Ghàidhealtachd, Belladrum, ag ràdh gu bheil iadsan dòchasach gun tèid aca air a cumail am-bliadhna.

Bidh an fhèis ga cumail san Lùnasdal ach cleas HebCelt cha do thachair i ann an 2020

Thuirt stiùirichean Bhelladrum gun robh cunnart gun tèid a cur dheth fhathast le mì-chinnt a' phandemic, ach gu bheil iad fhathast ag ullachadh air a son le dòchas gun tèid i air adhart.

Thug iad taing dhan a h-uile duine a tha a' cumail taic riutha.