Càin air dithis shreapadairean

Chaidh càin air dithis shreapadairean ann an Loch Abar air an deireadh-sheachdain is iad air riaghailtean a' Choròna-bhìorais a bhriseadh.

Thathas a' tuigsinn gun robh an dithis air draibheadh bho Ghlaschu gus Beinn Nibheis a dhìreadh.

Chaidh fios a chur air Sgioba Teasairginn Bheanntan Loch Abair mu 4.15f Disathairne gun robh iad ann an èiginn air a' bheinn.

Chaidh 20 ball den sgioba ann còmhla ri heileacoptair nam maor-cladaich à Inbhir Nis.

Rinneadh cobhair air na sreapadairean is chaidh an sgèith dhan Ghearasdan.

Cha robh iad air an goirteachadh ach chaidh càin orra airson riaghailtean Covid-19 a bhriseadh.

Rinn an luchd-teasairginn an uairsin cobhair air dithis fhireannach eile air Creag Meagaidh Oidhche Shathairne. Chaidh an dithis a thogail gu sàbhailte.

'S e sreapadairean ionadail a bh' annta is cha robh iad air riaghailtean Covid a bhriseadh.

Thuirt Sgioba Teasairginn Bheantan Loch Abair gun robh iad an dùil a dhol tron Fhaoilleach gun bhrath-èiginn idir 'son a' chiad turas a-riamh, mus an do dh'èirich an dà shuidheachadh Disathairne.

Dh'iarr iad air daoine na riaghailtean siubhail a th' ann an-dràsta ri linn a' Choròna-bhìorais a leantainn.