#làabairtnagàidhlig

Iomairt

Tha liosta de dh'abairtean aig Hands Up for Trad, air neo faodaidh daoine na h-abairtean aca fhèin a thaghadh.

Tha oidhirp ùr a' dol air adhart Dihaoine gus daoine a bhrosnachadh Gàidhlig a bhruidhinn.

'S iad a' bhuidheann Hands Up for Trad a tha air cùl #làabairtnagàidhlig no #sayagaelicphraseday.

Tha iad ag iarraidh air daoine abairt air choireigin a thaghadh is a chlàradh, is an uairsin am bhideo aca a sgaoileadh air na meadhanan sòisealta.

Bidh cuideachd tachartas air-loidhne aca feasgar le Joy Dunlop os a chionn.

"'S e seachdain chànanan na h-Alba a tha seo is shaoil sinn gur e fìor dheagh chothrom a bha sin Gàidhlig a bhrosnachadh", mhìnich Joy.

Coimhearsnachd

"Chan eil ann ach là a chaidh a chomharrachadh gus Gàidhlig a bhrosnachadh is a neartachadh air-loidhne.

"Tha mi a' smaoineachadh gu bheil coimhearsnachd ùr againn air-loidhne agus tha daoine a-nise a' feuchainn ri Gàidhlig a chleachdadh san dòigh sin, ach do dhaoine gu h-àraidh aig nach eil Gàidhlig, 's e seo a' chiad cheum.

"Tha e uabhasach furasta abairt a thogail is an uairsin sin a sgaoileadh", thuirt i.

Bidh an tachartas aig Joy air Facebook Hands Up for Trad aig 1f.

Chìthear abairtean bho chuid ann an sgioba BBC Naidheachdan air na meadhanan sòisealta tron là Dihaoine.