Chaidh bàs còigneir ann an aon là le Covid-19 a chlàradh ann an sgìre NHS na Gàidhealtachd.
Bha an àireamh a nochd bho Riaghaltas na h-Alba Diardaoin co-ionnan ris an àireamh as àirde airson aon là anns an sgìre bho nochd an galar an toiseach.
Uile gu lèir, tha a-nise 151 bàsan co-cheangailte ri Covid-19 air a bhith ann an sgìre NHS na Gàidhealtachd bho thòisich am pandemic.
Aig an dearbh àm, thuirt NHS na Gàidhealtachd gu bheil sgaoilidhean den Choròna-bhìoras ann an trì dachaighean-cùraim ann an Siorrachd Rois seachad.
Chaochail 30 duine le Covid-19 ann an dachaighean Castle Gardens is Kintyre House ann an Inbhir Ghòrdain, is ann am Fodderty House faisg air Inbhir Pheofharain.
Smachd
Thuirt am bòrd-slàinte gu bheil smachd aca a-nise air a' bhìoras anns na dachaighean.
Tha iad fhathast a' dèiligeadh ri sgaoilidhean den Choròna-bhìoras ann an dà dhachaigh-chùraim eile.
Chaidh 25 cùisean a dhearbhadh ann am Mull House ann am Barbaraville faisg air Inbhir Ghòrdain.
Tha 38 cùisean air a bhith ann aig dachaigh Meallmore Lodge ann an Deimhidh faisg air Inbhir Nis, far a bheil ceathrar air bàsachadh leis a' bhìoras.
