Dh'innis Bòrd Slàinte nan Eilean Siar gu bheil iad den bheachd gu bheil ceangal eadar gach cùis den Chòrona-bhìoras ann an Leòdhas.
Thuirt àrd-oifigear a' bhùird, Gòrdan Jamieson, gu bheil iad misneachail gun deach aca air ceangal a dhèanamh eadar an dà sgaoileadh san eilean.
Bha iad ron seo a' dèiligeadh ri cùisean a thòisich ann an Ospadal nan Eilean ann an Steòrnabhagh is clustair eile ann an Leòdhas mar sgaoilidhean fa leth.
Dh'innis Mgr Jamieson cuideachd gun deach dà chùis ùr a chlàradh ann an Leòdhas Diardaoin.
Thuirt e gu bheil ceangal dachaigh aig an dà chùis seo le cùisean a bh' ann mar-thà.
Tha còrr is 70 cùis den bhìoras a-nise air an dearbhadh ann an Leòdhas.
