Postair
Thèid fiolm ùr Gàidhlig fhoillseachadh air na meadhanan sòisealta 'son daoine òga a bhrosnachadh faighinn a-mach air a' bhlàr a-muigh.
Tha am fiolm 'Cuairt Bheag' stèidhichte air an spòrs agus an tleachd a tha ri fhaighinn do chloinn nuair a tha iad a' cluiche a-muigh.
Chaidh a sgrìobhadh agus a stiùireadh le Oifigear Dràma Fèisean nan Gàidheal, Aonghas MacLeòid.
Agus tha a' bhuidheann air am fiolm a sgaoileadh mar-thà am measg chròileagan agus bun-sgoiltean Gàidhlig air feadh na dùthcha.
Anns an fhiolm, bidh an caractar Hùb Hàb, air a chluich le Ceitidh NicPhàrlain, a' lorg bocsa draoidheil air an stairsneach aice agus a' dol air chuairt.
Tha Ceitidh NicPhàrlain a' cluich prìomh charactar an fhiolm Hùb Hàb
Òrain ùra
Agus chaidh trì òrain ùra a sgrìobhadh mu a bhith a' gabhail cuairt bheag anns na sgìrean faisg air dachannan na cloinne.
Thuirt Eilidh NicCoinnich, Manaidsear Fèisgoil - an t-seirbheis foghlaim aig Fèisean nan Gàidheal - gun d'rinn Ceitidh agus am fear-ciùil Pablo Lafuente obair mhìorbhaileach.
"Còrdaidh am fiolm ris a h-uile duine, anns an sgoil neo aig an taigh còmhla ris an teaghlach.
"Bidh faclan nan òran rim faighinn air an làraich-lìn againn 'son a sgaoileadh am measg òigridh agus an tidsearan, feadhainn eile sa chlas aca agus le teaghlaichean anns a h-uile àite," thuirt i.
Thèid am fiolm a sruthadh air làraich Facebook Fèisean nan Gàidheal, taobh a-muigh Disathairne 13mh Am Màrt.
