Tha na ròbotan air fàs nas bitheanta ann an ospadail na Rìoghachd Aonaichte anns na bliadhnaichean mu dheireadh.
Fhuair Bòrd Slàinte na Gàidhealtachd sealbh air ròbot a tha comasach air cuideachadh le obair-lannsa.
'S e seo a' chiad uair a bhios teicneolas dha leithid aig NHS na Gàidhealtachd.
Thàinig an ròbot thuca mar phàirt de phrògram Da Vinci.
Tha na ròbotan seo, a th' air an stiùireadh le dotairean, air fàs nas bitheanta aig bùird-slàinte anns na bliadhnaichean mu dheireadh.
Tha iad comasach air dotairean a chuideachadh ann an dòigh nas mionaidiche, nas sùbailte, is le barrachd smachd na tha comasach le obair-lannsa traidiseanta.
Thuirt Àrd-Stìuiriche NHS na Gàidhealtachd gu bheil iad air an dòigh gu bheil an teicneolas seo a' tighinn dhan cheann a tuath.
Bidh dotairean a' stiùireadh an ròboit.
"Cha robh sinn sa chiad dol a-mach air ar comharrachadh mar phrìomhachas 'son ròbot fhaighinn ach rinn sinn argamaid làidir", thuirt Pam Dudek.
"Tha a' chiad ròbot Da Vinci a-nise an seo is tha e air a chur an sàs.
"Tha an sgioba-lannsa againn air an dòigh, ach bheir e beagan ùine a-nise plana a stèidheachadh a thaobh mar a chleachdas sinn an ròbot", thuirt i.
Thuirt i gu bheil dùil gum bi buannachdan mòra ann do dh'euslaintich is gum bi e comasach obair-lannsa a bharrachd a dhèanamh is amannan feitheimh a ghearradh.
Thuirt i cuideachd gum bi an ròbot na tharraing a thaobh luchd-obrach a thàladh gu NHS na Gàidhealtachd.
