Thuirt Cathraiche Comataidh Leasachaidh na Comhairle gu bheil cuid de chompanaidhean a' gabhail brath air muinntir nan eilean.
Sgrìobh Comhairle nan Elean Siar gu riaghaltas na Rìoghachd Aonaichte a dh'iarraidh dìon a bharrachd air muinntir nan eilean bho chosgaisean lìbhrigidh àrda.
Chaidh gearanan coltach ris a seo a thogail leis a' chomhairle agus feadhainn eile cheana.
Tha iad a' togail air cho cudromach 's a tha e do mhuinntir nan eilean a bhith a' ceannachd air-loidhne, ach cuideachd air a' mhì-chinnt a th' ann mu an urrainn na tha ga cheannachd fhaighinn thuca, agus air dè a' phrìs.
Tha a' Chomhairle ag ràdh gu bheil cosgaisean àrda a' dèanamh croin air mòran gu h-àraid aig àm phandemic far am feum daoine stuth a cheannachd air-loidhne.
"A' gabhail brath"
"Tha sinn a' faicinn nach eil e cothromach gu bheil aig muinntir nan eilean ri barrachd a phàigheadh na tha aig daoine air tìr-mòr," thuirt Dòmhnall Crichton, Cathraiche Comataidh Leasachaidh na Comhairle.
"Tha oidhirpean air a bhith ga dhèanamh thairis air na bliadhnaichean ach tha mi a' smaointinn gu bheil an t-àm ceart agus freagarrach airson na draghan a tha seo a thoirt air beulaibh an riaghaltais."
"Tuigidh duine sam bith gum feum companaidhean prothaid a dhèanamh ach tha seo a' dol thairis air prothaid.
"Tha seo mar gu bheil iad a' gabhail brath air muinntir nan eilean", thuirt an Comh. Crichton.
