Gheibh luchd-ealain agus luchd-ciùil a chaill obair air sgàth buaidh Covid-19 cothrom clann-sgoile a theagasg mar phàirt de sgeama ùr bho Fhèisean nan Gàidheal.
Bidh mu 50 neach ri obair-teagaisg ann am bun-sgoiltean air feadh choimhearsnachdan eileanach na h-Alba gus buidhnean-obrach a ruith air cultar, cànan agus dualchas nan sgìrean.
Se "Treòir" ainm Gàidhlig a' phrògraim a tha ag amas luchd-oideachaidh a chur gu còrr is 100 bun-sgoil uile gu lèir.
Bidh a' mhòr-chuid de na clasaichean - ann an cuspairean leithid drama, ealain, ceòl agus dannsa - air an lìbhrigeadh tro mheadhan na Gàidhlig no tro dhualchaintean nan sgìrean fhèin.
Cothrom
Se Fèisean nan Gaidheal a bhios a' ruith a' phrògraim a bhios anns na h-Eileanan an Iar, Arcaibh, Sealtainn, Earra Ghàidheal is Bòd, air Ghàidhealtachd agus ann an Siorrachd Àir a Tuath.
Bidh am prògram aithnichte mar "Voar" ann an Sealtainn agus "Virr" ann an Albais.
Gheibh an luchd-oideachaidh taic bho Oilthigh na Gàidhealtachd 's nan Eilean agus gheibh iad teisteanas airson an cuid obrach.
'S e Riaghaltas na h-Alba a tha a' maoineachadh a' phrògraim le cuid den airgead a' tighinn bhon stòras a chaidh a stèidheachadh airson Plana Nàiseanta nan Eilean a chur an sàs.
Thuirt Fèisean nan Gàidheal gur e cothrom sònraichte bha seo luchd-ciùil agus luchd-ealain a tha ag obair air an ceann fhèin a chuideachadh.
