Thog buill-phàrlamaid Albannach draghan mòra mu laigsean bunaiteach a thaobh dòighean-obrach, earbsa agus ceannas aig Coimisean na Croitearachd.
Air a' mhìos a chaidh seachad, thuirt aithisg le Buidheann Sgrùdaidh na h-Alba gun deach earbsa a chall eadar bòrd-stiùiridh Choimisein na Croitearachd gus àrd-cheannardan na buidhne.
Dh'fhag sin gun do dh'innis am bòrd-stiùiridh dhan Riaghaltas nach robh earbsa aca anns an àrd-oifigear.
Bha laigsean eile ann a thaobh dòighean-obrach cuideachd.
Deasbad
'S e aithisg Earrann 22 a bh' ann - rud a tha a' ciallachadh gum feumar a' chùis a dheasbad sa Phàrlamaid.
Diardaoin, bha cothrom aig Comataidh nan Cunntasan Poblach ann am Pàrlamaid na h-Alba faighneachd dè dìreach a chaidh ceàrr.
Thuirt Àrd-Neach-Sgrùdaidh na h-Alba, Stephen Boyle:
"Cha robh an Coimisean a' faireachdainn gum b' urrainn dhaibh na ceumannan riatanach a ghabhail a thaobh nan laigsean a bha iad a' coimhead ann an ceannas an àrd-oifigeir".
Earbsa
Chaidh innse gu bheil a-nis làn earbsa aig a' bhòrd-stiùiridh anns an àrd-oifigear.
Ach chuala buill gum faodadh gun toir na thachair buaidh air obair na buidhne fhèin san ùine-fhada.
Chan eil, mar eisimpleir, còd riaghlaidh chorporra aig a' bhuidhinn.
Seo Pat Kenny bhon chompanaidh Deloitte LLP:
"Bha iad a' dol an sàs ann an gnothaichean nach robh còir aca - bha an t-àrd-oifigear an sàs ann a bhith a' stèidheachadh a' bhuidseit agus planaichean ionmhais - rudan a bhiodh mar bu trice an urra ri àrd-mhanaidsearan ann am buidheann phoblach."
Aithisg eile?
Thuirt Àrd-Neach-Sgrùdaidh na h-Alba nach b' urrainn dha a ràdh le cinnt nach biodh feum air aithisg eile den t-seòrsa seo.
Dh'innis e gu bheil plana aig a' Choimisean gnothaichean a chur ceart.
Ach chan e seo a' chiad turas a chaidh laigsean agus ceistean bunaiteach a thogail mu bhuidhnean poblach neo-roinneil ann an Alba.
Thuirt Àrd-Neach-Sgrudaidh na h-Alba gum faodadh gu bheil an t-àm ann ath-sgrùdadh a dhèanamh air an t-suidheachadh.
Dh'innis Stephen Boyle gu bheil an Riaghaltas ag obair a dh'ionnsaigh an leithid.
