Thuirt Poileas Alba gu bheil iad a' sìor fhàs iomagaineach mu fhireannach a th' air a bhith a dhìth air a' Ghàidhealtachd bho Dhidòmhnaich.
Dh'innis oifigearan gu bheil iad a-nise air càr Derek Hepburn a lorg ann am pàirc chàraichean Dàm Loch Maol Àrdaich ann an sgìre Ghleann Canaich.
'S ann à Inbhir Narann a tha Mgr Hepburn, 54.
Thuirt na Poilis gu bheil iad den bheachd gur dòcha gun robh e an dùil Sgùrr na Lapaich a dhìreadh, ach nach eil fios le cinnt dè an t-slighe a bha e a' dol a ghabhail.
Tha Mgr Hepburn 6' 1", caol, le falt dubh.
Thuirt oifigearan gu bheil e gu tur a-mach às an àbhaist do Mhgr Hepburn gun a bhith a' conaltradh ri a theaghlach.
Bu chòir do dhuine sam bith le fiosrachadh brath a chur air na Poilis air 101 is àireamh 1812 27/04 a thoirt seachad.
