Thuirt ceannardan gnothachais gu bheil turasachd is gnothachasan ann an ceann a tuath na h-Alba a' fulang ri linn mì-chinnt mu sheirbheisean còmhdhail.
Thàinig buille ùr is seirbheisean-adhair eadar Inbhir Nis is Béal Feirste air an tarraing.
Bha draghan air a bhith ann mar-thà mun bhuaidh aig stailcean rèile is troimhe-chèile le seirbheisean bhusaichean.
Bha Flybe air innse roimhe gun robh an t-slighe eadar Inbhir Nis is Béal Feirste gus tòiseachadh as t-samhradh mar phàirt de leudachadh anns na seirbheisean aca.
Thuirt iad ge-tà, gu bheil gainnead phlèanaichean a' ciallachadh gum feum iad na planaichean aca atharrachadh is a h-uile seirbheis a bha gu bhith ann eadar Inbhir Nis is Béal Feirste a tharraing.
Cinnt
Tha sin na adhbhar dhragh do cheannardan gnothachais.
Thuirt àrd-stiùiriche Sheòmraichean Malairt Mhoireibh, Sarah Medcraf, gur e buille eile a tha seo nuair a tha seirbheisean còmhdail mar-thà ann an staing.
"Eadar stailcean rèile is gainnead luchd-obrach, agus a-nise gainnead phlèanaichean - tha tòrr a' dol is tha daoine a' cur air dòigh thursan gun chinnt sam bith gun tèid iad air adhart.
"'S e fìor dhroch shuidheachadh a tha sin dhuinn sa cheann a tuath, an dà chuid do ghnothachasan agus do thurasachd.
"Chan eil na ceanglaichean againn math gu leòr co-dhiù, is feumaidh cinnt a bhith againn mu na seirbheisean a th' ann", thuirt i.
Thuirt Flybe gu bheil iad an dùil seirbheis eadar Inbhir Nis is Béal Feirste a stèidheachadh uaireigin san àm ri teachd.
