Tha briseadh-dùil eile ann do mhuinntir nan Eilean agus dàil a bharrachd air tighinn air te de na bàtaichean-aiseig ùra a tha gan togail air Chluaidh do Chaledonian Mhic a' Bhriuthainn.
Dh'innis Gàrradh MhicFhearghais nach bi an soitheach 802 a-nis deiseil gu Earrach 2024. Sin am bàta a bhios a' dol eadar Ùige, Loch nam Madadh is an Tairbeart.
Bha dùil gum biodh i deiseil ro dheireadh 2023.
Bidh an dà shoitheach, 802 agus an Glen Sannox, còrr air £150 millean thairis air buidseat agus còig bliadhna air dheireadh.
Tha a naidheachd seo a' tighinn là às dèidh dhan a phrògram Disclosure aig BBC Scotland sealltainn gun d'fhuair Garradh Mhic Fhearghais barrachd fiosrachaidh mu fheumalachdan teicnigeach nan soithichean na fhuair companaidhean eile.
Obair a' dol air slige 802
Trioblaid
Dh'aidich ball-pàrlamaid nan Eilean Siar aig Holyrood, Alasdair Allan, gur e buille eile a tha seo.
"An trioblaid a th'ann mar a tha fhios aig a h-uile duine gum bi buaidh air na planaichean a th'ann airson seirbheisean gu Uibhist a' Tuath agus dha na Hearadh," thuirt Mgr Allan.
"An rud as cudromaiche a th'ann 's e gum bi an gàrradh a cuir crioch air an obair ach chan eil mi toillichte agus tha mi smaointinn gum bi a h-uile duine den aon seòrsa beachd.
"Thuirt an riaghaltas ann am prògram a BhBC nach robh iad a seachnadh am pàirt a bh'aca anns a ghnothaich ach tha iomadach duine eile an-sàs leis cuideachd agus tha mi smaointinn gu bheil e cudromach a-nis gu bheil sinn a' faighinn a-mach dè thachair eadar CMAL agus Fergusons agus a bheil ceistean ann.
"Tha mise ag iarraidh freagartan agus thuirt mi sin anns a' phàrlamaid.
"A rèir choltais agus a' coimhead air a phrògram aig a BhBC tha earbsa nas làidire ann a-nis mu staid an dà eathar a th'ann agus an t-adhartas a th'ann leothasan," thuirt e.
