'S e a' Ghàidhealtachd an aon sgìre ann an Alba far a bheil àireamh nam feòragan ruadha sàbhailte bhon chunnart bho fheòragan glasa.
Tha seo a rèir sgrùdaidh a bhios ann am measg a' phobaill san Dàmhair gach bliadhna mar phàirt den phròiseact Sàbhaladh Fheòragan Ruadh na h-Alba.
Ghabh 659 duine pàirt san sgrùdadh ann an 2022 is na h-àireamhan air an cleachdadh le Urras Fiadh-bheatha na h-Alba san obair aca gus an fheòrag ruadh a dhìon.
Sheall an sgrùdadh gu bheil mar a tha an fheòrag ghlas air meudachadh a' fàgail gur ann "measgaichte" a tha cùisean ann an ceann a deas na h-Alba.
Obair dìon
Ann an Obar Dheathain tha obair air soirbheachadh gus àireamh nam feòragan glasa a lùghdachadh.
Ach sheall an sgrùdadh gur ann air a' Ghàidhealtachd a-mhàin ann an Alba a tha àireamh nam feòragan ruadha sàbhailte.
Chaidh innse gu bheil obair dìon bho oifigich timcheall air crìochan na Gàidhealtachd air feòragan ruadha na sgìre a dhìon.
Tha e comasach dhan phoball innse, taobh a-muigh fad na bliadhna ma tha iad air feòrag fhaicinn.
