Dh'fhosgail làrach bìdh ùr ann an Inbhir Nis.
Tha an Loch & Larder ann an Ionad Bhùithtean an Eastgate agus air an làraich far an robh gnothachasan bìdh roimhe.
Bidh còig gnothachasan bìdh air an tarraing còmhla fo bhratach an Loch & Larder.
'S e àite-bìdh neo-fhòirmeil a th' ann le àite-suidhe airson 174 daoine.
Chaidh còrr is £2m not a chosg a' sgeadachadh na làraich a tha air a bhith bàn bho dhùin na gnìomhachasan bìdh a bh' ann roimhe.
Tha ceannardan Ionad an Eastgate an dòchas gun tèid daoine a thàladh chun fharsaingachd bìdh a bhios air a reic.
Am measg na bhios ann bidh Scottish Kitchen le Gary Mac'Illeathain a buannaich MasterChef: The Pofessionals ann an 2016.
Cuide ris bidh Cluck, inver mercanto, Sweet Ness agus Ness n Korma. Tha dùil ri Fairground Cafe nas fhaide air a' mhìos.
Bha dùil gu robh an làrach a' dol a dh'fhosgladh san Dùbhlachd ach bha dàil ann.
An dèidh do dh'Ionad an Eastgate grunn bhùithtean a chall sna beagan bhliadhnachan mu dheireadh leithid Debenhams agus Topshop tha dòchas ann gun toir an làrach bìdh seo spionnadh as ùr dhan àite.
